Nga Saranda, ku po zhvillon “Foltoren” e rradhës, ish-Kryeministri Sali Berisha hodhi akuza të forta ndaj kreut demokrat Lulzim Basha dhe Kryeministrit Edi Rama.
Berisha tha se dorëzimi i 4200 firmave të delegatëve që kanë firmosur për mbledhjen e Kuvendit Kombëtar ka verbuar Lulzim Bashën dhe Edi Ramën.
“Peng-kryetari i verbuar nga drita e 4200 firmave, peng kryetari që rri mbyllur në zyrën e tij, peng kryetari që nuk takon dot as 3 demokratë, peng kryetari pa parti, ka frikë nga firmat tuaja, njëlloj si Edi Rama. Të dy janë tmerruar nga mbështetja që ju i dhatë Foltores, që mbrojtët pluralizmin politik”, tha Berisha.
Ai tha se peng-Kryetari dhe mafia e George Soros tentuan të asgjesojnë konservatorizmin në Shqipëri, por nuk ia arritën, pasi njerëzit e lirë u ngritën dhe morën në dorë frenat.
“Dua tju them këtu se ne pushtetin e Edi Ramës dhe sistemin e patronazhistëve të tij nuk e njohim. Ne do të ngrihemi më të fuqishëm se kurrë më parë dhe do të përmbysim me votë Edi Ramën dhe narko-shtetin”, tha Berisha.
