Krimet mjedisore duket se do të jenë prioritet për Policinë e Shtetit të drejtuar nga Gledis Nano, pas më parë Kryeministri Edi Rama në disa deklarata publike kërkoi angazhimin e forcave të rendit në këtë çështje.
Kështu pasi e fokusoi punën e policisë kundrejt atyre që vidhnin energjinë, në mandatin e parë qeverisës, atëherë kur nisi edhe kanabizimi i vendit, në mandatin e tretë, Rama ka vendosur që fokusi i strukturave që sot drejtohen nga ish-drejjtuesi i antiterrorit, Gledis Nano, të jetë te mjedisi.
Madje, ministri i Brendshëm, Bledi Çuçi, kërkoi nga strukturat policore klasifikimin e krimeve mjedisore, me të njëjtin prioritet si lufta ndaj krimit të organizuar, apo krimet ndaj jetës e pronës.
“Për çdo metër katror territor dhe dëmtim që ndodh në të, do të ketë përgjegjës dhe përgjegjësi të punonjësve të policisë”, tha ai.
Ministri deklaroi prerë se nuk do të ketë asnjë tolerim, por ndëshkim të ashpër ligjor për ndotje të mjedisit, prerje pyjesh apo dëmtim të lumenjve.
Drejtori i Përgjithshëm i Policisë së Shtetit Gledis Nano u shpreh se problematika për çështjet mjedisore qëndron. Ai tha se Policia e Shtetit, e cila zbulon ngjarje kriminale shumë të sofistikuara, i ka të gjitha kapacitetet për të gjurmuar dhe ndëshkuar edhe këtë natyrë krimi.
Aktualisht, tha ai strukturat vendore të policisë janë duke u angazhuar mbi disa plane masash, për mbrojtjen më të mirë të territorit, duke u ndalur tek ndërtimet pa leje, ndotjen e mjedisit apo dëmtimin e prerjen e pyjeve.
Ndoshta në kushte të tilla, duhet menduar edhe t´i ndryshohet emri Policisë së Shtetit, pasi ajo po luan rolin nga Policia Pyjore, te ajo Elektrike, Ndërtimore dhe kështu me rradhë.
