Kryeministri Edi Rama paralajmëroi sot të tjera ndryshime në Policinë e Shtetit. Gjatë prezantimit të buxhetit të shtetit për vitin 2022 për Ministrinë e Brendshme, Rama tha se kush nuk është në lartësinë e duhur nuk do të qëndrojë në detyrë.
“Ka rritje të cilësisë së punës të SHÇBA. Kam besim se puna e bërë sidomos në periudhën e fundit dhe rezultatet e arritura dhe mesazhi i dhënë se këtu nuk ka të paprekshëm dhe se këtu gjithskush që shkel uniformës përballet me ligjin.
Kështu na e bëjnë të ardhmen e afërt shumë inkurajuese. Kanë ndodhur ndryshime të rëndësishme në polici dhe do vazhdojnë të ndodhin sepse askush nuk do qëndrojë në një detyrë të lartë nëse nuk është në lartësinë e detyrës”, tha Rama.
Pak javë më parë, Kryeministri vendosi që të ndryshojë Kreun e Policisë së Shtetit, duke larguar Ardi Veliun dhe duke emëruar Gledin Nanon. Ky i fundit e nisi punën me disa ndryshime të drejtuesve të policisë në Qarqe dhe në komisariate, edhe pse lëvizjet ishin transferim emrash dhe funksionesh.
