Policia ka dalë me një njoftim zyrtar lidhur me aksionin anti-drogë zhvilluar këtë të Premte në Lezhë, ku u raportua se nga ana e efektivëve u qëllua me armë zjarri në ajër.
Në pranga u vu Shaqir Veseli dhe u sekuestruan disa doza kokainë në makinën me të cilën ai lëvizte.
Aksioni
“Komisariati i Policisë Lezhë, në bashkëpunim me specialistët për Hetimin e Narkotikëve dhe Trafiqeve të Paligjshme dhe Forcën Operacionale në DVP Lezhë, mbi bazën e informacioneve të siguruara në rrugë operative për një shtetas që lëvizte me automjet nga Miloti në drejtim të Lezhës, posedonte lëndë narkotike kokainë, në vendin e quajtur ‘Rrethrrotullimi i M+’, shërbimet e Policisë kanë lokalizuar mjetin e dyshuar tip ‘BMW’. Drejtuesi i mjetit nuk i është bindur urdhrit të punonjësit të Policisë për të ndaluar dhe ka tentuar të largohet duke përplasur automjetet e shërbimeve të Policisë dhe rrezikuar seriozisht jetën e tyre. Shërbimet e Policisë kanë arritur të ndalojnë dhe neutralizojnë mjetin me drejtues shtetasin Shaqir Veseli, dhe kanë ushtruar kontroll ndaj automjetit. Gjatë kontrollit të ushtruar, shërbimet e Policisë kanë gjetur lëndë narkotike kokainë, e ndarë në doza gati për shitje, të cilat u sekuestruan në cilësinë e provës materiale së bashku me automjetin”, njoftoi policia.
Në përfundim të veprimeve, efektivët bënë arrestimin në flagrancë të 27-vjeçarit Veseli, banues në Milot.
Ndaj tij rëndon akuza për veprën penale “Prodhimi dhe shitja e narkotikëve” dhe “Kundërshtimi i punonjësit të Policisë”.
Në njoftim, policia nuk përmend se ka pasur të shtëna me armë gjatë aksionit.
