Në Beograd do të vijojnë takimet mes përfaqësuesve të Serbisë, Shqipvrisë dhe Maqedonisë së Veriut, në kuadrin e asaj që u pagëzua si “Open Balkan”. Në dallim nga takimet e mëparshme, në Beograd do të mungojë Zoran Zaev, i cili dha dorëheqjen nga posti i Kryeministrit të Maqedonisë së Veriut, ndërsa ky vend do të përfaqësohet nga Nikolla Dimitrov, që mban funksionet e zv.Kryeministrit.
Ndërkohë që Serbia do të përfaqësohet nga Presidenti Aleksandar Vuçiç, Shqipëria do të përfaqësohet nga Edi Rama, një nga mbrojtësit më të flaktë të nismës që nisi si mini-Shengeni ballkanik dhe që u pagëzua më pas si “Ballkani i Hapur”.
Në axhendën e bërë publike tashmë lidhur me takimin e Beogradit, thuhet se Presidenti i Republikës së Serbisë, Aleksandar Vuçiç, nesër do të takohet me Ramën dhe Dimitrov, në kuadër të Ballkanit të Hapur. Iniciativa për Bashkëpunim do të mbahet në Pallatin e Serbisë (Bulevar Mihajla Pupina 2).
Takimit të tre zyrtarëve do t’i paraprijë një takim me përfaqësues të kompanive nga Republika e Serbisë, Republika e Shqipërisë dhe Republika e Maqedonisë së Veriut, si dhe me përfaqësues të Këshillit Atlantik.
Mini-shengenit ballkanik dhe më pas “Ballkanit të hapur” nuk i janë bashkuar 3 vende: Kosova, Mali i Zi dhe Bosnje Hercegovina. Ndërkohë që nga kancelaritë më të fuqishme në Botë, përfshi edhe SHBA dhe Gjermaninë, theksi është vënë në gjithëpërfshirjen. “Open Balkan” u tentua të interpretohet si një vijimësi i takimeve të Berlinit, por në fakt ai mbeti si një nismë e 3 vendeve, Serbisë, Shqipërisë dhe Maqedonisë së Veriut.
Të tre vendet kanë vijuar takimet sa në Novi Sad, më pas në Shkup, Tiranë dhe së fundmi në Beograd, ndërsa është folur për lëvizjen e lirë për mallrat dhe njerëzit, janë nënshkruar marrëveshje dhe janë marrë zotime, gjë që pritet të vijojë e njëjta panoramë edhe në Beograd.
Duket se “Open Balkan” përveç se është konsideruar si një projekt i mbështetur fuqimisht nga George Soros, djali i të cilit Alex Soros, në disa prej takimeve të zhvilluara ka qenë prezent apo në kontakte me pjesëmarrësit, duket se po pvrdoret nga secili prej pjesëmarrësve si një show apo propagandë, për interesa të ngushta politike.
PROGRAMI:
08.55 Mbërritja dhe foto e përbashkët e zyrtarëve
09.00-10.00 Takimi i zyrtarëve me biznesmenë
Shënim: Kameramanët dhe fotoreporterët do të mund të regjistrojnë fillimin e takimit.
10.00-10.30 Takimi i zyrtarëve me përfaqësues të Këshillit Atlantik
Shënim: Kameramanët dhe fotoreporterët do të mund të regjistrojnë fillimin e takimit.
10.30-11.30 Takimi i Presidentit Aleksandar Vuçiç me Kryeministrin Edi Rama dhe zëvendëskryeministrin Nikolla Dimitrov
11.30-12.30 Konferencë e përbashkët për shtyp e tre zyrtarëve
