Një 36-vjeçar u arrestua nga policia e kryeqytetit, pasi u kap me pistoletë me vete, njoftuan këtë të Mërkurë burime zyrtare.
Blutë bënë me dije se Forca e Posaçme “Shqiponja” ndaluan për verifikim një mjet në vendin e quajtur “Kodra e Diellit”. Drejtuesi i mjetit ka dalë nga makina dhe ka ikur me vrap duke mbajtur një çantë në dorë. Menjëherë efektivët janë vënë në ndjekje të personit dhe brenda disa minutave ndjekjeje, kanë kapur dhe prangosur shtetasin Sh.M, 36 vjeç, banues në Tiranë.
Gjatë kontrollit të çantës të dorës, shërbimet e Policisë kanë gjetur dhe sekuestruar edhe armën e zjarrit tip pistoletë dhe dy krehër me fishekë luftarak.
Në përfundim të veprimeve, nga specialistët për Hetimin e Krimit në Komisariatit të Policisë Nr.2 u bë arrestimi në flagrancë i shtetasi Sh.M, 36 vjeç, për veprën penale “Armëmbajtja pa leje”.
Materialet i kaluan Prokurorisë së Rrethit Gjyqësor Tiranë, për veprime të mëtejshme, njoftoi policia.
