Ka përfunduar në Gjykatën Kushtetuese seanca e cila ka shqyrtuar zgjedhjet e 30 qershorit 2019, të cilat u zhvilluar pa pjesëmarrjen e opozitës.
Vitore Tusha, kryetare e Gjykatës Kushtetuese, tha se vendimi do t´i komunikohet palëve brenda afateve. Ndërkohë avokati Jordan Daci, i cili mbron shoqatën e Bashkive, e cila paditi procesin në Kushtetuese, u shpreh optimist lidhur me vendimin.
“Kushtetuesja do të japë një vendim nga i cili nuk ka të humbur, por do të fitojë demokracia. Unë jam i bindur se Kushtetuesja do të japë një vendim që mbron zgjedhjet e rregullta. Opinioni i Venecias ka kontradikta, të cilat janë evidentuar. Nëse Kushtetuesja nuk paska kompetencë të marrë në shqyrtim kushtetueshmërinë e zgjedhjeve, atëherë kush është ky institucion në Shqipëri”, tha Daci.
Nuk dihet se kur Gjykata Kushtetuese mund të shpallë vendimin, por afati që ajo ka është 1 mujor. Shoqata e Bashkive, e drejtuar nga kryebashkiakja në detyrë e Shkodrës, Voltana Ademi, ka kërkuar anullimin e zgjedhjeve të 30 qershorit dhe ripërsëritjen e tyre.
