Pranë spitalit të Krujës vijojnë të paraqiten raste të reja me shenja të helmimit, që dyshohet se u shkaktuan nga uji.
Raportohet se ditën e sotme ka pasur 4 raste të reja të cilët kanë marrë ndihmën e parë dhe janë larguar nga spitali, ndërsa pasditen e djeshme deri në darkë vonë ka pasur 20 raste.
Uji i pijshëm ka shkuar mbrëmë në çezmat e krutanëve, por vetëm 1 orë.
Banorëve i është dhënë urdhër nga autoritetet që ujin mos ta përdorin për të pirë e të gatuar, por vetëm për t’u larë.
Banorët shprehen se e kanë blerë ujin për të pirë që nga dita e Hënë. Shumë rej tyre gjithashtu shprehen se nuk kanë mundësi të vijojnë të blejnë ujë për ditë pasi shumica janë të papunë.
Mbrëmjen e djeshme, 28 tetor ISHP ka publikuar përgjigjen e analizave duke sqaruar se ujërat sipërfaqësorë shkaktuar nga reshjet e ditëve të fundit janë përzier me ujin që qytetarët përdornin për konsum. Nëndrejtori i Institutit të Shëndetit Publik Dritan Ulqinaku tha se bakteri “enterokok” ishte i pranishëm vetëm në një pikë të shpërndarjes së ujit.
