Jamie Lynn Spears, motra e vogël e Britney Spears, ka bërë një rrëfim tronditës në librin e saj “Things I Should Have Said”, ku fajëson prindërit se i bënë presion që të abortojë në moshën 16-vjeçare.
Në fragmentet e publikuara nga “TMZ”, Jamie Lynn pohon se pasi i tha të atit, Jamie, dhe nënës, Lynne, se ishte shtatzënë në vitin 2007, ata “shkuan në dhomën e saj dhe u përpoqën ta bindnin se të kishte një fëmijë në atë pikë të jetës së saj, ishte një gjë e tmerrshme.”
“Do të të shkatërrojë karrierën. Je thjesht shumë e re. Ti nuk e di se çfarë je duke bërë. Ka pilula që mund të marrësh. Ne mund të të ndihmojmë ta zgjidhësh këtë problem… Unë njoh një mjek. Të gjithë rreth meje thjesht donin ta zhduknin këtë ‘problem’… të gjithë ishin të sigurt se ndërprerja e shtatzënisë do të ishte veprimi më i mirë”- pretendon ajo se i thanë prindërit.
Pavarësisht këtyre, Jamie vendosi ta mbante bebin, por kjo shkaktoi një debat të ashpër me babanë e saj, i cili jo vetëm e fyeu, por i sugjeroi që ta jepte fëmijën për birësim. Gjatë kësaj periudhe të vështirë, ajo tregon se kishte shumë nevojë për Britney-n, por këngëtarja nuk ishte në gjendje ta ndihmonte.
“Kisha nevojë për të më shumë se kurrë, por nuk ishte në gjendje të më ndihmonte… Dhimbja që nuk mund t’ia tregoja vetë motrës sime vazhdon ende edhe sot,”- tha ajo duke iu referuar Britney-t.
