Një ditë më parë, biznesmeni Nazim Çangu, me familjarë të tij, denoncuan një ngjarje të rëndë që ndodhi në banesën e tyre, rreth orës 01:00 të ditës së dielë.
Referuar dëshmive mediatike, por edhe atyre që janë dhënë për policinë, biznesmeni dhe familjarë të tij, thanë se të paktën 10 persona të armatosur dhe të maskuar, hynë në banesën e tyre në Nikël, ku pas dhunës së ushtruar, arritën të largohen me rreth 100 mijë euro, lekë cash dhe bizhuteri.
Policia, sipas raportimeve, ka shoqëruar të paktën 15 persona, të cilët janë marrë në pyetje dhe më pas janë lënë të lirë.
Nga burimet mësohet se grupi hetimor, nuk ka arritur të fiksojë në vendin e ngjarjes, pra në banesën e biznesmenit shenja gishtash, apo qoftë edhe ndonjë fije floku të autorëve, ndërkohë që janë marrë pamjet e siguruara nga kamerat. Kjo duket se është ajo ç´ka policia shpreson se do të mund të krijojë një identikit të autorëve, edhe pse është raportuar se ishin të maskuar.
Biznesmeni ka thënë se nuk ka ndonjë dyshim dhe se s’ka mundur të identifikojë ndonjë nga autorët as nga zëri dhe as nga përmasat trupore.
Gjithashtu ai ka pohuar se është përleshur me grabitësit. Çangu ka qenë një efektiv policie, më pas është larguar nga rradhët e saj, për t´u punësuar në një tjetër institucion shtetëror si inspektor, dhe më pas është marrë me biznes.
Policia ende nuk ka dalë me ndonjë deklaratë lidhur me ngjarjen, përmes një njoftimi paraprak ku raportohej mbi grabitjen.
