Ambasadori i delegacionit të BE në Tiranë, Luigi Soreca, nuk është njohur akoma me amendimet kushtetuese të PD për reformën territoriale, kodin zgjedhur dhe vettingun në politikë, por tha se kthimi i opozitës në Kuvend është demokraci.
“Nuk kemi pasur ende mundësinë të shikojmë propozimin, e dimë që është dorëzuar në Kuvend nga PD. Por siç e thashë dhe dje kur dorëzova raportin e progresit, kjo është demokracia. Kjo është demokracia dhe ja si po funksionon që tashmë opozita është rikthyer në Kuvend dhe sjell iniciativa. Kemi bashkëpunuar me PD dhe kur ishte jashtë Kuvendit dhe do ti ndjekim zhvillimet brenda partisë. Asgjë nuk do ndryshojë, do të vazhdojmë të bashlëpunojmë me të gjitha partitë politike”, tha Luigi Soreca nga Korça, duke iu përgjigjur interesit të gazetarëve.
Soreca u pyet edhe për krijimin e Agjencisë për Media dhe Informim nga kryeministri Rama.
“Dje prezantuam progres-raportin ku e kemi bërë të qartë qëndrimin e BE për lirinë e medias. Jemi shumë të qartë për rolin që luajnë gazetarët dhe i japim shumë rëndësi. Ky rol duhet të vijiojë të jetë shumë i rëndësishëm për lirinë e medias në vend. Është kyçe dhe jetike që mediat, gazetarët të kenë qasje dhe akses në të gjitha aktivitetet që kryhen. Do ti ndjekim zhvillimet nga afër siç kemi bërë në vitet e shkuara. Liria e medias është kyçe për BE”, u shpreh ai.
Deklaratat Soreca i bëri në aktivitetin e mbajtur në Korçë ku drejtues të pushteteve lokale në juglindje dhe atyre të Maqedonisë zhvilluan një aktivitet se bashku.
