Jo pak raste janë edhe kur trajnerë të ndryshëm në futboll shfrytëzojnë postin për të patur favore të tjera. I tillë është rasti i Milutin Sredojevic, trajnerit serb të njohur edhe ndryshe me emrin Michu i cili ka marrë një dënim të bujshëm me 3 vite burg për ngacmim seksual.
52-vjeçari, aktualisht trajner i Ugandës, u shpall fajtor për dy akuza për ngacmim seksual në Afrikën e Jugut, vendi ku ai menaxhonte ekipin e njohur Pirates Orlando.
Drejtësia e Afrikës së Jugut e dënoi Sredojeviçin me tre vjet burg për secilin krim, por serbit nuk do t’i duhet të hyjë në burg nëse 5 vitet e ardhshme nuk shkakton ndonjë krim tjetër të ngjashëm. Dënimi, që ndërkohë është apeluar u dha këtë të mërkurë në një gjykatë rajonale në qytetin Gqeberha të Afrikës së Jugut dhe siç mësohet akuza u bë nga një grua.
39-vjeçarja e kishte denoncuar atë për ngacmim seksual të kryer në një stadium gjatë një turneu sportiv dhjetorin e kaluar, ndërsa ajo ishte duke punuar duke shpërndarë kafe.
Përmes një deklarate, Zyra e Prokurorit të Afrikës së Jugut zbuloi se viktima e pyeti trajneri Sredojeviç nëse kishte nevojë për sheqer me kafen dhe ai iu përgjigj se kishte nevojë për “një lloj tjetër sheqeri”, ndërsa tregonte pjesët e tij intime.
Nëse trajneri tashmë bën diçka tjetër të paligjshme, ai do të shpallet në kërkim ndërkombëtare për ta sjellë më pas në burg për llogari të Afrikës së Jugut.
