Deputeti demokrat Agron Gjekmarkaj ka reaguar lidhur me progres-raportin e Komisionit Europian, ndërsa është ndalur në pjesën ku flitet për mediat.
“Në vendin tonë, në vendin tim, revolta është korruptuar, revolta është asgjësuar, është vrarë, qoftë edhe nën sehirin e bashkësisë ndërkombëtare në Tiranë.
Gjithsesi, e thash në fillim që raporti, për herë të parë nën optikën time, për çështjen e medias është më realisti.
Jo sepse është në unison me qëndrimet e opozitës për çështjet e medias, por më shumë të shoqërisë, e cila vlen më shumë se opozita dhe maxhoranca në tërësinë e vet”, tha Gjekmarkaj.
Ai vuri theksin në faktin se gazetarët në Shqipëri nuk mund të zgjidhin problemet e tyre, nuk kanë asnjë mënyrë, veç, asaj të nënshtrimit dhe modifikimit, për të mbijetuar për rrogën dhe bukën e gojës.
“Çështja tjetër që mua më shqetëson është qasja që kemi patur për dy institucione themelore, që ju e përmendni në raport me vërtetësi madje.
Çështja e AMA-s, ku vini theksin në kontestimet që ka patur zgjedhja e kryetares së saj.
Në fakt, nuk është një kontestim i vogël. Është diçka themelore, është raporti me ligjin, ju e dini më mirë se unë.
Ku mungon ligji, fillon xhungla dhe sundimi.
Ka qenë zëdhënëse e Partisë Socialiste zonja që është zgjedhur, duke thyer ligjin.
Çështja tjetër është çështja e radio-televizionit, ku sot 8 përfaqësues janë përfaqësues të maxhorancës, duke prishur edhe kriteret e “opozitës lodër” që ishte dy vitet e fundit në parlament.
Çështja është që problemet tona nuk do i zgjidhni ju por duhet t’i zgjidhim vetë. Pjesërisht kemi dështuar për t’i zgjidhur sepse jemi në një rreth vicioz”, tha ai.
