Vijon të mbeten mister vdekja e 4 turistëve rusë në sauna, në një prej hoteleve në zonën e Qerretit. Sipas mediave ruse, incidenti po hetohet nga seksioni konsullor i Ambasadës ruse në Tiranë, e cila u njoftua lidhur me ngjarjen nga autoritetet shqiptare mbrëmjen e së martës.
Fillimisht u tha se shtetasit rusë Natalia Burenkova, 58 vjeçe, Sergei Burenkov, 60 vjeç, Nikita Belousov, 37 vjeç dhe Ekaterina Burenkova 31 vjeçe, mund të ishin asfiksuar, pasi kishin qëndruar mbi 1 orë në sauna.
Më pas u hodh pista e një helmimi të mundshëm, por që u përjashtua si mundësi nga analizat që iu bënë trupave të viktimave.
Familja ruse bashkë me katër të tjerë, kanë hyrë që të dielën në territorin shqiptar nëpërmjet një agjencie turistike të administruar nga një shtetase ukrainase dhe gjatë këtyre ditëve kanë shëtitur vendin. Gjatë ditës së djeshme ata kanë qenë në Ohër dhe kanë ndaluar vetëm disa minuta në Librazhd.
Më pas shtetasit rusë janë futur në zonën e saunas bëjnë me dije burimet dhe kanë qëndruar atje për një kohë të gjatë duke ngjallur dyshime tek recepsionistja e hotelit, e cila ka shkuar duke trokitur në derë, por nuk ka marrë përgjigje.
Më pas, punonjësja e hotelit i ka gjetur ata pa shenja jete kur burrë grua ishin me këmbët në pishinë dhe të shtrirë. Dhëndri ishte në shezlong dhe vajza e çiftit pak më tej.
