Nënkryetarja e PD, Jorida Tabaku, në një intervistë për A2Cnn, u shpreh se vendimi i kreut demokrat, Lulzim Basha, për të përjashtuar nga grupi parlamentar, ish-Kryeministrin Sali Berisha, ishte i vështirë, por i pashmangshëm.
“Argumentet dhe vendimet që u morën pikërisht për të evituar këtë situatë aktuale dhe për të evituar që kjo të ndodhte. E kam thënë disa herë dhe e përsëris. Ishte një vendim shumë i vështirë, por ishte i pashmangshëm. Ishte një vendim i pashmangshëm për të ardhmen e Partisë Demokratike për rrugëtimin që ne duam dhe për betejën që ne kemi me PS”, tha Tabaku.
Ajo theksoi se kjo çështje nuk mund të shihet si një çështje teknike, statute apo interpretimi.
“Duhet ta shikojmë këtë si një çështje të rëndësishme për të ardhmen e Partisë Demokratike dhe të përpiqemi të gjithë bashkë që ta bëjmë atë më të madhe. Edhe më demokratike”, tha Tabaku.
