Për herë të parë, ish-Kryeministri Sali Berisha, nga Foltorja e Kukësit, ka pohuar se fraksionet në Partinë Demokratike do të jenë të mirëpritura.
“Po ua them që këtu se fraksionet do të jenë të mirëpritura, ato kanë rregullat e tyre, dhe do të pranohet çdo fraksion që do të bazohet në këto rregulla”, tha Berisha.
Ai u shpreh se sot ne angazhohemi për ta bërë Partinë Demokratike sa më demokratike, pasi sot ne jemi 30 herë më të ditur se 30 vite më parë kur themeluam këtë parti.
“Çdokush që mendon se mund të ngrejë një fraksion, sipas rregullave, është i mirëpritur. Ndaj firmosni atë formularin për mbledhjen e Kuvendit Kombëtar të PD për ta demokratizuar partinë, për të bashkuar të gjitha vlerat e kësaj partie”, tha Berisha.
Sipas tij, Partia Demokratike do të jetë bashkimi i vlerave më të mëdha. “Në këto vite në vend që PD të hapej ndaj intelektualëve, u rrudh”, shtoi Berisha.
