Arrestohen dy personat që ishin në makinë me Aldi Ramën, 21-vjeçari i cili qëlloi për vdekje me armë zjarri dje efektivin e policisë Saimir Hoxha.
“Në vijim të veprimeve të kryera nga grupi i posaçëm hetimor, nën drejtimin e Prokurorisë Lezhë, për zbardhjen dhe dokumentimin e plotë të ngjarjes ku mbeti i vrarë punonjësi i Policisë Saimir Hoxha, në përfundim të veprimeve të para hetimore u bë arrestimi në flagrancë i shtetasve Armando Marku, 26 vjeç dhe Kristian Sheri, 27 vjeç, banues në Lezhë”, njoftoi policia, pa specifikuar akuzat që rëndojnë ndaj tyre.
Ndërkohë, rreth orës 05:35 të mëngjesit të sotëm, ka ndërruar jetë në Spitalin e Traumës në Tiranë, autori i ngjarjes, Aldi Rama. Ekspertët mjeko-ligjorë, në prezencë të grupit hetimor dhe nën drejtimin e Prokurorisë së Rrethit Gjyqësor Lezhë, po kryejnë autopsinë dhe gjithë veprimet e tjera ligjore.
Sipas një rindërtimi paraprak të ngjarjes, Aldi Rama qëlloi me armë zjarri për vdekje efektivin e policisë Saimir Hoxha pasi u ndalua nga një patrullë teksa lëvizte me një automjet. 21-vjeccari u arratis dhe pas disa orë ndjekjeje u gjet i plagosur rëndë nga policia në një zonë të pyllëzuar. Ai u transportua në spital, por nuk mundi të mbijetojë.
