Saimir Hoxha, oficeri i policisë kriminale të Lezhës, u ekzekutua mëngjesin e sotëm me një plumb në zemër nga një 21 vjeçar, i identifikuar si Aldi Rama. Ky i fundit rreth 6 orë pasi ekzekutoi oficerin e krimeve, u vetëqëllua dhe sipas të dhënave ndodhet në gjendje kritike për jetën.
Por si ndodhi ngjarja që i mori jetën efektivit të Policisë Kriminale?
Nga raportimet mësohet se policia e Lezhës kishte nisur një operacion anti-drogë ku shin angazhuar efektivë policie me veshje civile dhe që lëviznin me makina private, pra jo me logot apo shenjat e Policisë së Shtetit.
Fillimisht efektivët civilë kishin asgjesuar 110 rrënjë lëndë narkotike. Më pas 3 efektivë, mes të cilëve edhe Saimir Hoxha kanë identifikuar një automjet, ku ndodheshin 3 persona.
Nga raportimet mësohet se Saimir Hoxha i është afruar automjetit, ndërsa në sediljen e pasme ndodhej 21-vjeçari Aldi Rama.
Dyshimet janë se 21-vjeçari ka qëlluar pa paralajmërim ndaj oficerit të policisë me një plumb që e ka goditur në zemër. Dy kolegët që ndoodheshin me Hoxhën nuk kanë reaguar, pasi i kanë dhënë ndihmën e parë efektivit të shtrirë në tokë, ndërsa automjeti ku ndodhej autori i krimit është larguar me shpejtësi.
Pas njoftimit në sallën operative, janë angazhuar FNSH dhe RENEA, ndërsa kontrollet janë shtrirë fillimisht në 4 qarqe Durrës, Tiranës, Lezhës dhe Shkodrës.
FNSH ngriti pika kontrolli në këto qarqe dhe pothuajse u ndalua çdo makinë për kontroll.
Pas më shumë se tre orësh, policia arriti të lokalizojë zonën ku dyshohej se fshihej autori i krimit, e cila ishte ajo e Vainit në Lezhë, pranë vendit të ngjarjes.
Ai ishte i armatosur dhe gjatë operacionit për kapje qëlloi dy herë me armë zjarri në drejtim të helikopterit të policisë.
“Në lidhje me ndjekjen, lokalizmin dhe kapjen e autorit të vrasjes së oficerit të Policisë, forca të shumta të Policisë së Shtetit, prej disa orësh ndjekjeje me helikopter dhe nga toka, kanë bërë të mundur lokalizimin e autorit të ngjarjes, i cili ishte fshehur në zonën e kënetës në “Lagunen Vain”.
Forcat e Policisë kanë krijuar perimetrin e sigurisë dhe i kanë bërë thirrje autorit që të dorëzohej, por autori i ngjarjes, shtetasi Aldi Rama nuk i është përgjigjur thirrjes së Policisë për t’u dorëzuar, por është vetëplagosur me armën e tij. Aktualisht po transportohet nga forcat e Policisë për në spital, në gjendje kritike për jetën.
Në vendngjarje është sekuestruar arma e krimit dhe telefoni i tij celular”, njoftoi policia në përfundimin e operacionit, që zgjati rreth 6 orë.
Autori i dyshuar i krimit, Aldi Rama, duket se ka pasur pasion armët, pasi në rrjetin social, gjendet një foto e tij, teksa shfaqet i ulur në një tavolinë me një pistoletë.
Gjithashtu vite më parë, ai ka qenë duke pozuar në krah të Kryeministrit Edi Rama.
