Kryeministri Edi Rama tha mbrëmjen e sotme në emisionin “Open” se nuk ka komunikuar me Presidentin serb, Aleksandar Vuçiç, lidhur me situatën e krijuar në veri të Kosovës.
Rama tha se Kosova ka absolutisht të drejtë lidhur me marrëveshjen për reciprocitetin e targave, duke shtuar se situata u tensionua pas afrimit të mjeteve ushtarake serbe në kufi me Kosovën.
“Akte teatrale, show që bën Serbia. Janë akte teatrale, pasi Kosova nuk është një vend pa zot dhe dihet se pas Kosovës është një aleancë e tërë ndërkombëtare ushtarake.
Por veprime të tilla, ngjallin tensione dhe i kthejnë qytetarët serbë të Kosovës si pengje të mbetura rrugëve”, tha Rama.
Ai shtoi se nuk ka marrëdhënie të ftohta me Albin Kurtin.
“Janë sajesa mediatike, jemi në kontakt të vazhdueshëm me Albin Kurtin. E vetmja mosmarrëveshje që kemi është “Open Balkan””, tha Rama.
Ai tha se është e drejta e autoriteteve në Kosovë që ta shohin “Open Balkan” në një këndvështrim tjetër dhe ne e shohim në një këndvështrim tjetër.
“Nga ana jonë nuk do të ketë asnjë ndryshim qëndrimi ndaj kësaj nisme”, tha Rama.
