A është varianti Delta i koronavirusit më i keq për fëmijët? – pyet Associated Press. – Jo, ekspertët thonë se nuk ka ende dëshmi të forta që i bën fëmijët dhe adoleshentët më të sëmurë se versionet e mëparshme të virusit, edhe pse Delta ka çuar në një rritje të infeksioneve tek fëmijët sepse është më ngjitës.
Aftësia e Delta për t’u përhapur më lehtë e bën atë një rrezik për fëmijët dhe nënvizon nevojën për maska në shkolla dhe vaksinime për ata që janë mjaft të rritur, tha Dr Juan Dumois, një mjek i sëmundjeve infektive pediatrike në “Johns Hopkins All Children’s Hospital” në St. Petersburg, Florida.
Shkalla javore e infeksionit në mesin e fëmijëve amerikanë arriti në 250,000, duke tejkaluar kulmin e dimrit, sipas të dhënave nga Shoqata Amerikane e Pediatrisë dhe Spitalit të Fëmijëve. Që nga fillimi i pandemisë, më shumë se 5 milionë fëmijë në SHBA kanë rezultuar pozitivë për COVID-19.
Varianti Delta është identifikuar në të paktën 180 vende, sipas Organizatës Botërore të Shëndetit. Në shumë prej tyre, rritja e infeksioneve ka nënkuptuar gjithashtu një rritje të shtrimeve në spital tek fëmijët e vegjël dhe adoleshentët.
Në SHBA, shkalla e shtrimit në spital për COVID-19 ishte më pak se 2 për 100,000 fëmijë në fund të gushtit dhe në fillim të shtatorit-e ngjashme me kulmin e dimrit të kaluar, sipas Qendrave për Kontrollin dhe Parandalimin e Sëmundjeve. Por pjesa e fëmijëve të shtruar në spital me sëmundje të rënda nuk ka ndryshuar ndjeshëm.
