Në “Këndin e Pano Sokos” në Syri Tv, u dha një mesazh i fortë për realitetin shqiptar, që jetojmë të gjithë.
Soko theksoi se mesazhi i deputetit Saimir Korreshit në Kuvend kishte një domethënie të veçantë, pasi u fol për faktin se në Shqipëri ka dallim të madh mes pushtetarëve dhe popullit.
Në fjalën e tij, Soko vë në dukje se në Shqipëri ka të pangopur për bukë, sikundër ka edhe të pangopur për pasuri, që nuk ngopen kurrë.
“Seanca e gjatë e miratimit të qeverisë, pati brenda vetes edhe një ngjarje tjetër. Gjatë diskutimeve të saj, spikati edhe diskutimi i deputetit të Lushnjës, zotit Saimir Korreshi, që në fakt u bë i famshëm për një arsye joetike, pasi kur po diskutonte, shumë deputetë të të dyja krahëve filluan të qeshin, ndoshta me theksin e tij, se di. Por ai është fjalimi më i vërtetë që është mbajtur në atë parlament. Qeshin kur tha se nuk arrin dot datën, se ju nuk e dini, s’e dini as si shprehje se çfarë do të thotë “të mos arrish datën”.
Ju duket si bashkim fjalësh, kot pa sens, por po ua shpjegoj unë. Nuk arrin dot datën, është shprehje që e përdorin të varfërit, kur duan të thonë se nuk iu dalin lekët të arrijnë datën e radhës, kur kanë për të marrë pensionin apo rrogën. Ju bëhen zero lekët në shtëpi, para se të vijë pensioni apo rroga e muajit tjetër. Mendoni se ata kanë hall sesi është raporti tjetër i OSBE ODIHR? Ata kanë hall se me këtë rritje të çmimeve, do shkojë gjeli 100 mijë lekë, e nuk do hanë Vit të Ri dot.
Ju mendoni se ata nuk i zë dot gjumi për opinionin e Komisionit të Venecias? Ata as e dinë çfarë është Komisioni i Venecias. Madje, një pjesë e tyre as e dinë çfarë është Venecia. Ata kanë hallin mos mbyllen sërish në karantinë e rrinë një muaj pa punë, siç qëndruan vjet, ju thoni Venecia. E kuptoni se jetoni në dy galaktika të ndryshme.
Dhe ju merrni vendime për ta, që ju nuk dini sa kushton domatja, qepa, trangulli, speci, mishi, karrota, merrni vendime për të gjithë ata, që gjithçka fitojnë e harxhojnë vetëm për ushqime. Keni një gjë të përbashkët, edhe ju edhe ata jeni të pangopur. Ironi poetike. Shqipëria jonë në fakt është vendi i të pangopurve. Ca janë të pangopur me bukë, ca nuk ngopen me pasuri. Ca të pangopur që kanë çdo gjë qeshin me ca të pangopur që nuk kanë asgjë. E pra ju që qeshni, mos u ngopshit kurrë”, tha Soko.
