Kreu i sindikatës së industrisë, Taf Koleci i ka bërë thirrje qeverisë që nëpërmjet instancave të urdhërojë mbylljen e “Zonës D” ku humbi jetën minatori, Muharrem Plaku.
Gjatë një interviste për “Fax News”, Koleci e konsideron shumë të rrezikshme këtë galeri për të cilën thotë se punohet jashtë çdo lloj kushti.
Sipas kreut të sindikatës, kryeministri duhet t’i tërheqë “veshin” drejtorëve dhe të vendosë pikën mbi “i” për të parandaluar humbjen e jetëve të tjera të minatorëve. Koleci gjithashtu bën publik një tjetër shqetësim, figuracionin e jetës firmat private paguajnë vetëm për 3 punëtorë, pjesa tjetër është e pasiguruar duke punuar në të zezë.
“Ngushëllime familjes të ndjerit. Kjo ngjarje është shumë e rëndë dhe zona D është jashtë cdo lloj kushti sepse aty nuk ka asnjë kusht, ajo galeri duhet të mbyllet dhe të futet në recension të thellë. Ata që punojnë aty duhet të jenë persona që kanë integritet dhe që investojnë në këto galeri.
Atje është një xhungël dhe të gjithë kanë lishensë , aty nuk pyet futet punëtori nxjerr. Aty s’duhet të shkelë hap njeriu. Qeveria ti ndalojë punëtorët , sepse ka drejtorinë, ministrin përkatëse që të nxjerr urdhra të menjëhershme që mos fshihen pas ngjarjes. Që nga ministria deri tek drejtoria përkatëse që të mbyllet zona D pasi ka krijuar xhepa dhe rrezikon shumë. Në shkallë republike janë disa miniera qe duhet të mbyllen, Kukës, Korçë, Pogradec dhe shumë të tjera duhen mbyllur pasi i kanë disa pronarë dhe shfrytëzojnë minatorin duke rrezikuar jetën. Të shkretët punojnë për copën e gojës për të ushqyer fëmijët, nuk ka struktura të veçanta, qeveritarët i dinë mirë por fshihen.
Që nga kryeministri duhet ti tërheqë veshin drejtorëve dhe ata të vendosin pikën mbi “i” që mos lënë minatorët të vriten. Në zonën e Samir Manes ka lezet të punosh pasi plotëson të gjitha kushtet. Kompanitë nuk paguajnë siguracionin e jetës , psh paguajnë për 3 veta kurse 40 të tjerë të pasiguruar. Në kontratë kolektive ka qenë 60 milion të vjetra që ti marrë familja që humbi personin e dashur.
Pronarët nuk e pranojnë që sindikatat të jenë brenda sepse ne i hapim probleme për gjithçka, për paga për kushtet e punës për gjitha. Sindikata nuk mund të futet brenda pasi ata thonë që ka kontratë me qeverinë. Institucionet shtetërore të jenë të vëmendshme dhe të mbyllin zonën D që është shumë e rrezikshme. Të gjithë institucionet mos jenë të korruptuar përpara pronarit”, përfundoi Koleci.
