Alfred Rrushaj, nënkryetar i PD, tha në emisionin “Opinion” se me Partinë Demokratike e lidh historia familjare. Rrushaj tha se është zgjedhur, por nuk ndjehet ende nënkryetar i PD, pasi këtë e bën baza e partisë dhe aksioni opozitar.
Referuar përplasjes në PD, pas përjashtimit të Sali Berishës, nga Grupi Parlamentar, Rrushaj tha se vendimin e ka mësuar pasi Lulzim Basha e shpalli atë.
“Vendimi ishte në mendjen e secilit prej nesh. Nuk kisha asnjë mendim personalisht, pasi ishte një çështje shumë delikate. Kam qarkulluar në mendje argumentet pro dhe kundër.
Vendimi është shumë i vështirë. Unë e njoh vetë zotin Berisha dhe unë e besoj thellësisht se ai kurrë nuk i ka kërkuar dikujt para apo ti ketë marrë para. Basha mori një vendim politik, duke iu larguar emocioneve. Mori një vendim politik duke shmangur një izolim të PD nga partnerët tanë strategjikë”, tha Rrushaj.
Sipas tij, Basha mendon se është në të drejtën e tij për të marrë vendimin dhe ky ishte politik.
“Basha është shprehur se demokratët e kanë votuar për të marrë vendime të forta dhe pikërisht ky ishte një vendim i tillë”, tha Rrushaj.
