Për 8 muaj arriti të fshihej, ndërsa dita ditës shtoheshin dyshimet se kishte vdekur, brenda automjetit të tij, që u gjet i djegur në Pukë.
Por Davide Pecorelli, ndoshta rastësisht u zbulua se ishte gjallë dhe ndodhej në vendin e tij, Itali, teksa tashmv i duhet të japë shpjegime para autoriteteve hetimore italiane, lidhur me inskenimin e vdekjes.
“Dua të shoh fëmijët e mi, pastaj do të flas”, raportohet nga mediat italiane të ketë thënë Pecorelli, një ish-arbitër futbolli, para organeve policore, ku u thirr për të dhënë shpjegime.
Ai duhet të japë shpjegime mbi një krim të simuluar, ndërsa në Shqipëri ai po hetohet lidhur me shkatërrimin e pronës me zjarr, pasi automjetin e djegur e kishte marrë me qira në një prej kompanive që operojnë në Shqipëri, si dhe për dhunimin e varreve, pasi eshtrat e gjetura, në automjetin e djegur, dyshohet se ishin marrë nga një varrezë e vjetër.
Por a i ka kryer të gjitha veprimet i vetëm biznesmeni italian? Kjo pritet të zbardhet nga hetimet, sikundër ai duhet të shpjegojë edhe faktin se si ka mundur të largohet nga territori shqiptar dhe të hyjë në atë italian, pa u regjistruar me emrin e tij.
Dyshimet janë se Pecorelli ka arritur të largohet nga Shqipëria përmes pikës së Kalimit Kufitar të Hani të Hotit, ndërsa ai u zbulua rastësisht teksa me varkën e tij përpiqej të arrinte në ishullin Monte Kristo, por për shkak të njv avarie, iu desh ndihma e një tjetër varke, ekujpazhi i së cilës kishte njoftuar autoritetet italiane.
“Çdo problem në Shqipëri ose vështirësitë financiare që mund t’i jenë shfaqur, mund ta kenë vënë atë para problemeve ose në rrezik” shkruan gazeta “La Nazione” në Itali.
