Schalke 04 nuk arrin të krijojë vazhdimësi rezultatesh, teksa pas dy fitoreve radhazi, ka ardhur edhe humbja e tretë sezonale, këtë herë në shtëpi përballë Karlsruher.
Në “Gelsenkirchen” vendasit u tronditën që në sekondat e para, pasi Choi Kyoung-Rok shënoi golin e avantazhit për Karlsruher, megjithatë Schalke reagoi mirë dhe riktheu barspeshën në të 15-ën me anë të Terodde.
Në minutën e 72-të, mesfushori islandez Victor Palsson kreu një ndërhyrje mjaft të rëndë në mesfushë dhe u ndëshkua me karton të kuq, duke lënë Schalken me 10 futbollistë për pjesën e mbetur të ndeshjes.
Përfiton maksimalisht Karlsruher, që përveç epërsisë numerike u shpërblye edhe nga një gabim i japonezit Itakura dhe shënoi golin e fitores në minutën e 88-të, ndërsa më pas administroi avantazhin, për t’u larguar me tre pikë nga një transfertë e vështirë.
