Dinamo dhe Laçi janë ndarë në “paqe”, me një barazim 1-1, në takimin e luajtur në “Elbasan Arena”, ku sërisht VAR ka luajtur një rol kyç.
Ndeshja u ndez që në minutën e 4-t kur Ademi dha një pasim të saktë për Zarubica, por sulmuesi goditi keq dhe i hoqi mundësinë e festës kurbinasve.
Pas këtij rasti lojës iu rikthye barazia, por dalëngadalë Dinamo mori terren dhe krijoi disa mundësi të mira, derisa të shënonte në minutën e 42-të.
Gol, por jo i rregullt sepse gjyqtari Ferati, në bashkëpunim me VAR vendosi e cilësoi si pozicion jashtë loje vendosjen e Sofranac në momentin e golit, raporton ABC.
Pjesa e parë u mbyll me barazim pa gola. Me nisjen e së dytës, Dinamo vazhdoi të ishte agresive dhe arriti të finalizojë me sukses punën e bërë, duke shënuar në minutën e 53-të.
Isaevski nisi një top në zonë nga e majta dhe Julian Shehu, në tentativë për ta nxjerrë jashtë, tundi rrjetën e tij, pa i lënë asnjë mundësi Sherrit për të reaguar.
Pas golit gjithçka foli për Laçin, që aktivizoi Mazrekajn dhe ky i fundit shtoi shumë klas dhe rrezik në portën e Dinamos, që ashtu si me Kastriotin, u mbyll mbrapa pas golit të shënuar.
Në minutën e dytë të shtesës Laçi shënoi me Roganovic dhe pasi gjyqtari shpenzoi rreth 3 minuta në rishikimin e golit në VAR, i dha të drejtë Laçit dhe e cilësoi golin e rregullt, duke fiksuar shifrat 1-1.
Më pas kishte shumë pak kohë për të ndryshuar rezultatin dhe të dyja skuadrave iu desh të mjaftohen me “paqen” dhe ndanë nga një pikë pas një beteje mjaft të fortë.
