Katër muaj nga vdekja e Caroline, 20-vjeçares në Greqi, ka folur nëna e Babis Anagnostopulos.
Për herë të parë gruaja ka thyer heshtjen, duke folur vetëm për mbesën e tyre. “Ne e takojmë mbesën 5 ditë në muaj në fund të çdo muaji, ashtu siç dhe gjykata ka vendosur. Nuk kemi pasur probleme. Rregulli po respektohet nga të dyja familjet”, tha ajo.
Nëna e Babis, 31-vjeçarit që vrau barbarisht gruan e tij, duke lënë pas një vajzë, nuk foli për ngjarjen e rëndë, duke preferuar të heshtë. Gazetarët i treguan asaj se në varrin e viktimës është hequr mbishkrimi “bashkëshorte” pasi u mor vesh se ishte pikërisht partneri i saj që e ka vrarë.
Ajo më pas u pyet për këtë ndryshim, por përgjigja e saj ishte shumë e ftohtë. “Nuk e di, nuk kam dijeni dhe nuk kam asgjë për të thënë për këtë ndryshim”, është shprehur ajo. Mediat greke shkruajnë se në varrin e 20-vjeçares është shkruar “Për nënën dhe vajzën tonë të dashur”.
Kujtojmë se ngjarja e rëndë ndodhi në maj, ku 31-vjeçari mbyti bashkëshorten e tij. Ai më pas e shiti ngjarjen si një grabitje dhe vetëm një muaj pas krimit makabër, piloti pranoi krimin. Aktualisht ai ndodhet në burg.
