Kryeministri i Kosovës, Albin Kurti, u takua në Tiranë me kancelaren gjermane, Angela Merkel, e cila zhvilloi turin e fundit Ballkanik, ku takoi drejtuesit e qeverive të vendeve të Rajonit, me qëllim për t´i dhënë shtysë Procesit të Berlinit.
Kurti ka publikuar pamjet e takimit me Merkel.
“Filloi takimi me Kancelaren gjermane, Angela Merkel. Bashkë me zëvendëskryeministren dhe ministren e Punëve të Jashtme dhe Diasporës, Donika Gërvalla do të diskutojmë për marrëdhëniet bilaterale mes dy vendeve tona dhe bashkëpunimin rajonal brenda agjendës së Bashkimit Evropian” shkruan Kurti në Facebook.
Ndërkohë Kurti ka shprehur mbështetje për procesin e Berlinit, duke e cilvsuar mjaftueshëm të gjerë. Kurti tha se në bisedimet Kosovë-Serbi, statusi i Kosovës është i padiskutueshëm. “Nuk kompensojmë Serbinë me territore”, u shpreh Kurti pas takimit me Merkel në një konferencë për mediat. Kurti tha se krimet e luftës nuk mund të harrohen dhe do të kërkohet deri në fund drejtësi.
Ndërsa u shpreh për stabilitetin e Rajonit, Kurti vuri theksin në plotësimin e 4 kushteve të përcaktuara në procesin e Berlinit.
