Detaje të tjera janë zbardhur nga mbledhja me dyer të mbyllura të kreut demokrat, Lulzim Basha, me kryetarët e degëve të PD, e cila u mbajt sot në selinë e kësaj partie.
Mes një kërkese për të nisur një tur takimesh në bazën e partisë për sqarimin e anëtarëve lidhur me vendimin dhe udhëzimit të Bashës drejtuar kryetarëve të degëve për të mos u përfshirë në debatet lidhur me çështjen në fjalë, kreu demokrat mësohet të jetë shprehur se është i gatshëm të takojë dhe të sqarojë në çdo moment ish-Kryeministrin lidhur me vendimin.
Nga burime brenda mbledhjes, mësohet se Basha u shpreh se Berisha vijon të jetë një anëtar i përhershëm i Këshillit Kombëtar, si dhe i Kuvendit Kombëtar.
“Vendimi për përjashtimin e z.Berisha nga Grupi Parlamentar është më i vështiri për mua. Fakti që ai vendim u mor në momentin e fundit tregon se kam bërë dhe kemi bërë gjithçka që të gjendej një rrugë për ta shmangur këtë situatë.
Por vendimi është do të jetë në fuqi për aq kohë sa z. Berisha të sqarojë pozitat e tij, për një çështje që edhe ai vetë është shprehur se është një betejë personale dhe ligjore. Unë nuk kam mohuar Sali Berishën dhe historinë e tij në këtë parti.
Ai është anëtarë i përhershëm i Kuvendit Kombëtar dhe Këshillit Kombëtar. Dera e PD është e hapur për të. Në çdo kohë që ai do të takohet, unë do ta takoj dhe jam i gatshëm ta sqaroj për vendimin që kam marrë”, u tha Basha, kryetarëve të degëve të PD-së.
