Erion Braçe, i cili për rreth dy vjet ishte në postin e zv.Kryeministrit në Qeverinë Rama, duket se është kujtuar për të denoncuar në rrjetet sociale një fenomen që ka të bëjë me institucionet financiare, që në jo pak raste janë denoncuar nga qytetarët për mashtrimet që iu bëjnë atyre, në rastin e kredive.
E megjithëse ky është një fenomen i njohur dhe gjatë kohës që ishte zv.Kryeministër, qoftë edhe formalisht, kurrë nuk ndërmori ndonjë nismë ligjore apo qoftë edhe të propozonte një ndërhyrje në ligj, sot si deputet i thjeshtë, Braçe ka reaguar në rrjetet sociale.
Ai i referohet denoncimit të një qytetari, student në Tiranë, i cili i shkruan se mori një kredi te “IUTE CREDIT” në shtator të 2019, por nga janari i 2020 deri në maj nuk ishte në gjendje të paguante për shkak të problemeve që shkaktoi COVID-19.
Studenti thotë se kredia i kaloi në përmbarim dhe tashmë i kërkon dyfishin.
Nisur nga kjo situatë, por edhe rastet e bujqve, Braçe kërkon që njerëzit të mbrohen nga këto grabitje duke krijuar një agjenci të re publike për të mbrojtur konsumatorin.
“Jeni ndjerë të mashtruar dhe grabitur me borxh të shpejtë? Urdheroni lexoni ne foton e dytë;
Është mesazhi që mora sot nga një student që edhe punon. Ka marrë një borxh të shpejte në një institucion financiar borxhi, jo bankë, dhe borxhi po e mbyt! E zuri kriza e Covid në 2019-2020″, shkruan Braçe.
