Ish-presidenti Bujar Nishani ka komentuar Qeverinë “Rama 3”, që u bë publike sot nga Kryeministri Edi Rama në mbledhjen e Asamblesë Kombëtare të PS.
Nishani shkruan në rrjetet sociale se shqiptarët edhe katër vitet e ardhshme do kenë një Qeveri Kukull, ministra manekinë të gardërobës në errësirë të një njeriu që ka marrë peng gjithçka në këtë vend.
Sipas tij, opozita nga ana tjetër është rehat deri sa të vijnë zgjedhjet, pasi nuk ka asnjë parapërgatitje, asnjë vizion, asnjë projektim dhe asnjë strategji.
“Shqiptarët edhe katër vitet e ardhshme me një Qeveri Kukull, manekinë të gardërobës në errësirë të një njeriu që ka marrë peng gjithçka në këtë vend.
Peng qeverisjen, peng parlamentin, peng drejtësinë, peng ekonominë, peng sistemin politik, peng vetë shtetin, peng Shqipërinë. Pengmarrësi, ndërsa tallet përsëri me shqiptarët me një “Qeveri Kukull”, përgatitet me zell për të fituar garën e ardhshme. Çdo kukull në funksion të grabitjes elektorale të rradhës!
Po Opozita? Opozita është rehat! Ka kohë! Ohu…., deri sa të vijnë zgjedhjet, shohim e bëjmë! Asnjë parapërgatitje, asnjë vizion, asnjë projektim, asnjë strategji! Do të “sajojë” diçka edhe atëherë!”, shkruan Nishani.
