Dorëzimi i mandatit të deputetit nga Lefter Koka, i cili garoi në 25 prill në listën e PS-së në Qarkun e Durrësit, ka shkaktuar humor në rrjetet sociale.
Genc Sejko, i njohur si njeriu i memeve, shkruan në rrjetin social “Alamet burri Lefter Koka. I bleu votat me lekët e veta dhe pastaj e lëshoi mandatin për t’i hapur rrugën të rinjëve. Kush tha se ‘Shqipëria nuk bëhet’?”.
E ndërkohë në rrjet kanë shpërthyer memet ironizue ndaj ish-ministrit të LSI, i cili herë shfaqej si mik i Edi Ramës dhe herë në krah të Ilir Metës, që nga momenti që ka hyrë në politikë, ku u katapultua nga Fatos Nano.
Në prag të zgjedhjeve të 25 prillit, Koka shfaqej me Ramën duke i bërë thirrje Nasip Naços të bashkohej me PS.
” O Nasip po ku je o burrë”, dëgjohet në video Koka, ndërsa Rama qeshte me batutat “pa krip” të Lefterit, drejtuar Nasipit.
Nuk dihet nëse pas dorëzimit të mandatit si deputet, Koka do të bëjë ose jo ndonjë video tjetër, ku t´i kërkojë Nasipit të dorëzojë mandatin edhe ai, meqë të dy, pothuajse në të njëjtën kohë iu bashkuan ekipit rilindas të Ramës.
