Paris Saint Germain tani mund të ketë yllin e saj në fushë. Lionel Messi debuton zyrtarisht me ekipin e tij të ri duke nisur një epokë të re në karrierë pas shumë viteve me Barcelonën teksa në ndeshjen ndaj Reims argjentinasi preku për here të parë fushën me fanellën e parizienëve.
Skuadra e Pochettinos e nisi me trion Neymar-Mbappe-Di Maria sfidën, me Messin në stol dhe gjithçka e zgjidhi ai që me shumë gjasa do të largohet, Mbappe por që në fakt me dy golat e shënuar në fitoren ndaj Reims nuk ka asnjë gjest apo sinjal në festimin e tij.
Goli i parë erdhi me kokë në 16’ pas një asisti nga Di Maria ndërsa goli tjetër në 63’ pas një asisti perfekt nga Hakimi.
Në 66’ më në fund erdhi edhe momenti i Messit i cili zëvendësoi Neymar por me futjen e tij skuadra nuk u sforcua dhe as argjentinasi nuk i “ndezi” mirë motorët në pritje të arritjes së kondicionit më të mirë fizik.
Me këtë fitore PSG merr 3 pikë bashkë me debutimin e shumëpritur të Messit e ndërkaq duhet të zgjidhë edhe çështjen Mbape.
