Tre persona janë arrestuar në Vlorë në një aksion anti-drogë, mes tyre dhe Ferndinand Llanaj, me precedent të mëparshëm kriminal.
“Operacioni policor i koduar ‘Otima’ u zhvillua nga Drejtoria Vendore e Policisë Vlorë, Forcat Speciale RENEA dhe Drejtoria e Forcës së Posaçme Operacionale, nën drejtimin e Drejtorisë së Përgjithshme të Policisë së Shtetit, bazuar në informacionet e marra në rrugë operative se në zonën e Otimës në Selenicë, persona me precedent kriminal kishin kultivuar bimë narkotike”, sqaruan këtë të Premte burime zyrtare.
Përveç Ferndinand Llanajt, 43 vjeç, banues në Selenicë, i njohur dhe me nofktën “Robi” u arrestuan dhe Dritan Begaj, 54 vjeç, banues në Vlorë dhe Ergi Cura, 21 vjeç, banues në Librazhd. Të arrestuarit akuzohen për veprat penale “Prodhimi dhe shitja e lëndëve narkotike” dhe “Kultivim i bimëve narkotike”, kryer në bashkëpunim.
Këta shtetas, në bashkëpunim me njëri-tjetrin, kishin kultivuar një numër të konsiderueshëm bimësh kanabis sativa në ambientet e banesës së shtetasit Ferndinand Llanajt dhe në ambientet përreth një objekti po në pronësi të këtij shtetasi, në vendin e quajtur “Përroi i Otimës”, Selenicë, sqaroi policia.
Gjatë kontrolleve të ushtruara në këto ambiente, u gjetën dhe u sekuestruan në cilësinë e provës materiale një sasi lënde narkotike kanabis, 4 automjete, dy prej tyre të blinduara, 6 aparate celular dhe një shumë parash, shtuan të njëjtat burime.
E kaluara
Dy nga tre të arrestuarit në Selenicë të Vlorës për kultivim të lëndëve narkotike, Ferdinand Llanaj dhe Dritan Begaj kanë qenë shënjestër e një atentati në Lungomare të Vlorës në tetor të 2017.
Llanaj në muajin Tetor 2017, i shpëtoi atentatit në rrugën “Transballkanike”, ku ishte duke udhëtuar nën shoqërinë e Dritan Begës dhe djalit të tij të vogël. Në këtë ngjarje Begaj mbeti i plagosur.
Ferdinand Llanaj është një emër jo pak i njohur për policinë kriminale.
Familja e tij në Selenicë është përfshirë në një sagë hakmarrje, me fisin Xhaferaj në Selenicë. Ferdinand Llanaj është vëllai i Aleksandër Llanaj, i dënuar me burgim të përjetshëm për ngjarjen e masakrës së “Çoles”, ku në 7 prill 2015 humbën jetën 3 persona Haki Rakipi, Alfred Velaj dhe Albi Limaj.
