“Sa i përket merkatos, ne do të vazhdojmë të jemi aktivë në afrime në ato pozicione ku duam të dublojmë në rolet natyrale. Jemi të kompletuar në portë dhe në mbrojtje, ndërsa në mesfushë dhe në sulm duam të marrim lojtarë cilësorë dhe me kontrata afatgjata”.
Kështu u shpreh trajneri i Partizanit Ilir Daja në intervistën e dhënë për “Panorama Sport” pas miqësore së zhvilluar me Egnatian në Ohër dhe që u përsërit edhe në fundjavën e shkuar pas testit me Pogradecin. Kur kanë mbetur edhe katër ditë nga mbyllja e merkatos së verës, dëshirat dhe kërkesat e trajnerit Daja për forcimin e Partizanit mbeten ende në ajër. Klubi ka qenë shumë pasiv në javët e fundit sa i përket merkatos, ku pa dyshim largimet e titullarëve pas aventurës europiane kanë lënë “gropa” të hapura në ekip.
Praktikisht, nisur edhe nga thëniet e stafit, por edhe dëshirat e dashamirësve, Partizani ka nevojë që të përforcohet me të paktën tre elementë të spikatur. Afrimi i një organizatori është i domosdoshëm. Për këtë rol thuhet se kanë akord me një mesfushor 22-vjeçar nga Kongo, Masanga Matondo, i cili ende nuk po duket. Ekipi ka nevojë gjithashtu të forcohet me të paktën një sulmues krahu, i cili do të plotësonte boshllëkun e lënë nga largimet e Asanit, Çinarit dhe Malës. Ndërsa dëshira e vjetër që nuk po gjen zgjidhje, pika referuese në majë të sulmit nuk duket në horizont.
Partizani prej kohësh është në kërkim të një “pyke”, por edhe ato numra nëntë që janë afruar ndër vite nuk kanë dalë “të hajrit”. Mario Gjata, sulmuesi 21-vjeçar i Apolonisë, është një nga më të lakuarit, por nuk dihet arsyeja pse nuk po gjendet gjuha e përbashkët mes klubeve.
Edhe pse janë orët e fundit të merkatos, sërish ka shpresa për përforcime në kampin e kuq, pasi referuar traditës goditjet e shumë dëshiruar klubi në pjesën dërrmuese i ka kryer në mbyllje të procesit. Nëse një vit më parë legjitimohej pasiviteti i “demave” në merkato, pasi FIFA u kishte ndalur të bënin afrime nga çështja “Çinari”, i pashpjegueshëm është pasiviteti në këtë sesion merkatoje.
