Autoritetet shëndetësore në Kosovë kanë njoftuar edhe për 16 vdekje të reja që janë shkaktuar nga COVID-19.
Sipas raportit ditor të Ministrisë së Shëndetësisë, gjatë 24-orëve të fundit janë regjistruar edhe 2.098 raste të reja me koronavirusin e ri, nga 12.564 testime.
Mjekët kanë konstatuar se 1.614 pacientë janë shëruar nga sëmundja.
Numri i rasteve aktive në Kosovë mbetet i lartë – gjatë 24-orëve të fundit ka arritur në 25.407 persona.
Në spitalet e Kosovës, 55 pacientë me koronavirus janë në gjendje të rëndë shëndetësorë, njoftoi të premten Shërbimi Spitalor dhe Klinik Universitar i Kosovës. Sipas raportit ditor, numri i përgjithshëm i pacientëve me koronavirus, të shtruar në spitale, është 1,051. Prej tyre, 952 pacientë janë duke u trajtuar me oksigjeno-terapi dhe 55 janë në gjendje të rënduar shëndetësore, thuhet në raport.
Në Kosovë, deri më tani, janë dhënë mbi 780,000 vaksina kundër koronavirusit, ndërsa me dy doza janë vaksinuar mbi 260,000 qytetarë.
