E reja Rexhina Çelhaka është vënë nën arrest nga policia një ditë pas aksidentit tragjik të ndodhur në “Qafë-Muzinë”, ku pesë persona humbën jetën. Burime zyrtare konfirmuan se ndaj së resë rëndon akuza për veprën penale “Shkelja e rregullave të qarkullimit rrugor”.
Aksidenti
Nga përplasja e mjetit tip “Land Rover’” që drejtonte e reja me një furgon, mbetën të vdekur pesë persona që udhëtonin me furgon: një çift shqiptarësh me banim në Ukrainë, dy shtetas ukrainas dhe shoferi i furgonit.
Po ashtu, të plagosur mbeti edhe një pasagjere në furgon, Greta Daberdini dhe tre vajzat që udhëtonin me “Land Rover” – drejtuesja e mjetit dhe dy pasagjere me shtetësi italiane.
“Rexhina Çelhaka, 22 vjeçe, banuese në Tiranë, duke drejtuar mjetin ‘Land Rover’, në aksin rrugor Muzinë-Jorgucat, është përplasur me mjetin tip furgon me drejtues shtetasin Bardhi Proda, 51 vjeç dhe për pasojë mjeti furgon ka rënë disa metra poshtë rrugës.
Si pasojë e aksidentit kanë humbur jetën drejtuesi i furgonit, Bardhi Proda, banues së Sarandë, pasagjerët Fiqiri Korçari, 77 vjeç, Dritë Korçari, 72 vjeçe (burrë e grua), Tetiana Fediaieva, 48 vjeçe dhe Olesander Fediaieva, 53 vjeç, banues në Ukrainë.
Gjithashtu kanë mbetur të dëmtuara shtetaset Greta Daberdini, 25 vjeçe, banuese në Tiranë (pasagjere në mjetin tip furgon), Rexhina Çelhaka (drejtuese e mjetit ‘Land Rover’), Anna Cascavilla, 23 vjeçe dhe Giulia Parimi, 22 vjeçe, banuese në Itali (pasagjere në mjetin ‘Land Rover’)”, njoftoi policia.
Grupi hetimor, nën drejtimin e Prokurorisë, vijon punën për përcaktimin e shkakut dhe rrethanave të aksidentit, shtuan të njëjtat burime.
Dëshmia e pasagjereve
Dy pasagjerët italiane, të cilat ishin në makinën ‘Range Rover’ që u përplas me furgonin e linjës Sarandë-Tiranë kanë rrëfyer versionin e tyre të aksidentit.
“Furgoni e mori kthesën gjerë dhe shoqja jonë (drejtuesja e ‘Range Rover’) frenoi për të shmangur përplasjen, ndërsa makina rrëshqiti nga lagështia”, kanë rrëfyer dy pasagjeret Anna Cascavilla dhe Giulia Parimi.
