Gjykata e Sarandës ka lënë të lirë një shtetas turk kundrejt garancisë 1 mln lekë të reja, por edhe me detyrimin që çdo javë, ditën e hënë ora 13.00, të paraqitet në Prokurorinë e Sarandës.
Turku M.K, 38-vjeç, në 20 gusht rreth orës 08.40 zbriti në Sarande me tragetin e linjës që vinte nga Korfuzi.
38-vjeçari me banim ne Stamboll dorëzoi në sportel një pasaportë që rezultoi ALERT.
Ai u justifikua se e kishte deklaruar pasaportën të humbur por e kishte gjetur sërish.
Megjithatë policia vazhdoi hetimin dhe rezultoi se pasaporta ishte shpallur në kërkim nga Interpol Ankara.
Sipas Interpolit, ajo nuk ishte lëshuar për turkun M.K por për një shtetas tjetër, i cili e kishte deklaruar të humbur.
Madje 38-vjeçari M.K rezulton person në kërkim kombëtar në Turqi dhe në informacionin e përcjellë nga Interpol ishte dhe krahasimi i fotove, i turkut që posedonte aktualisht pasaportën dhe i atij që realisht e kishte humbur atë.
Policia e Sarandës arrestoi të dyshuarit për “falsifikim i leternjoftimeve, pasasportave dhe vizave”.
4 ditë më vonë, Gjykata e Sarandës vendosi masën e sigurisë “garanci pasurore 1 milion lekë” dhe “detyrim për t’u paraqitur në policine gjyqësore, çdo javë, ditën e hënë ora 13.00”.
Gjykata i la afat deri në datën 29 gusht turkut për të paguar garancinë dhe deri në pagesë duhet të qëndrojë në masën “Arrest me burg”.
Vitet e fundit është vënë re një tendencë në rritje e shtetasve turq për të hyrë në mënyrë të paligjshme në Sarandë përmes rrugëve detare, kryesisht me pasaporta të falsifikuara përmes trageteve ose të fshehur nëpër jahte e veliera.
Ka pasur raste që ata kanë ardhur edhe me gomone në Sarandë.
Ardhjet e tyre të dyshimta shpesh kanë rezuluar të lidhura me trafikun e drogës, ku shumë gomone apo veliera janë kapur ose në Greqi ose në Turqi, të ngarkuar me marijuanë të nisur nga brigjet e Sarandës.
