Myrto Uzuni do të duhet që këtë vit të kënaqet vetëm me fazën në grupe të Ligës së Europës, pasi Ferencvaroshi i tij nuk ia doli të kalonte në grupet e Ligës së Kampioenve, duke u eliminuar në play-off nga Jang Bojz.
Në ndeshjen që vlente 25 milionë euro, aq sa llogariten fitimet minimale për çdo skuadër në grupet ë Champions, Ferencvaroshi duhej të përmbysje humbjen 3-2 në sfidën e parë në Zvicër. Megjithatë, ishte Jang Bojz që e nisi ndeshjen me gol, duke kaluar që në minutën e 5-të në avantazh me Zesiger. Por pastaj Ferencvaroshi përmbysi rezultatin me Uingo dhe Mae, me këtë të fundit që mori asistin nga Uzuni i cili harkoi saktësisht nga goditja e këndit.
Në pjesën e dytë Jang Bojz barazoi shifrat me Fasnaht e pasi Ferencvaroshi mbeti me 10 lojtarë, shënoi edhe golin e 3-2 me anë të Mombimbi, duke siguruar grupet e Ligës së Kampioneve. Aty kalojnë edhe Malmo, ndonëse u mund 2-1 nga Ludogorets pasi kishte fituar 2-0 sfidën e parë, si dhe Benfika pas barazimit 0-0 me PSV, të cilin e kishte mundur 2-1 në shtëpi. Ndërsa humbëset e tre sfidave do të duhet të ngushëllohen në grupet e Ligës së Europës.
