Një ngjarje e rëndë ka tronditur qytetin e Lushnjes mbrëmjen e sotme, ku të shtënat e kallashnikovit kanë lënë të vrarë një person, plagosur 3 të tjerë dhe terrorizuar banorët që kishin dalë shëtitje.
Një makinë në lëvizje ka qëlluar drejt lokalit të njohur si ‘Pedonalja’ në Lushnje, duke lënë të vdekur pronarin e saj 40-vjeçarin Bledar Muça dhe duke plagosur 3 të tjerë, të cilët janë Judin Velo, Ervis Tafa dhe Sara Liçi.
Të shtënat me armë kanë terrorizuar të gjithë qytetin, ku gra dhe fëmijë u shtrinë përtokë në momentin e ngjarjes.
Burime për Boldnews.al bënë me dije se Muça është qëlluar me kallashnikov nga një makinë në lëvizje tip ‘Golf’. Ai është dërguar menjëherë në spital, por nuk ka mundur tu mbijetojë plagëve të marra.
Dyshohet se personat që kanë qëlluar në drejtim të tij të jenë dy, ndërsa policia ka ngritur postoblloqe në të gjithë qytetin.
Gjithashtu rezulton se Muça ka qenë i dënuar më parë për vrasje me dashje e mbetur në tentativë.
“Sot rreth orës 22:00, në një lokal në pedonalen e qytetit, është qëlluar me armë zjarri dhe për pasojë ka ndërruar jetë shtetasi B. M dhe kanë mbetur të plagosur shtetasit J. V., 32 vjeç, E. T dhe S. L., 24 vjeçe të cilët ndodhen në spital nën kujdesin e mjekëve.
Janë ngritur pika kontrolli në hyrje-dalje të qytetit dhe po vijon krehja e zonës me qëllim kapjen e autorëve. Vijon puna për zbardhjen e rrethanave dhe dokumentimin e plotë të ngjarjes”, thotë policia.
;
