Një person është proceduar penalisht për mosdeklarim të parave në kufi nga polici në Kapshticë, që ka sekuestruar 24.980 euro.
“Shërbimet e Stacionit të Policisë Kufitare Kapshticë në bashkëpunim me autoritetet doganore, si rezultat i kontrolleve të shtuara bazuar edhe në analizën e riskut, në dalje të Republikës së Shqipërisë, kanë kaluar në vijën e dytë, për kontroll të imtësishëm automjetin tip ‘Opel’ me drejtues shtetasin F. R., 35 vjeç, banues në Pogradec. Gjatë kontrollit të ushtruar, iu gjetën e sekuestruan në cilësinë e provës materiale 24.980 euro, sasi të cilën ky shtetas nuk e kishte deklaruar”, njoftoi policia.
Veprimet e mëtejshme, shtuan të njëjtat burime, u kryen nga specialistët për Hetimin e Krimit Ekonomik-Financiar, në Drejtorinë Vendore të Policisë Korçë, të cilët filluan procedimin penal ndaj 35-vjeçarit, ndërsa materialet i kaluan Prokurorisë pranë Gjykatës së Shkallës së Parë Korçë.
