Policia ka njoftuar forcim të masave të sigurisë në ditën e fundit të Festës së Birrës, që zhvillohet këtë mbrëmje, me pjesëmarrjen e këngëtarit Goran Bregoviç. Ky i fundit konsiderohet si frymëzues i masakrave serbe në Kosovë, ndaj dhe pjesëmarrja e tij në këtë event ka prodhuar reagime të forta në Shqipëri dhe Kosovë.
“Rikujtojmë qytetarët se mbrëmjen e sotme, në këtë aktivitet do të lejohen të hyjnë vetëm personat të cilët janë të pajisur me biletë. Pranë vendit të quajtur ‘City Center’, këta shtetas do t’i nënshtrohen edhe një kontrolli fizik, ku nuk do të lejohet mbajtja e sendeve të ndaluara dhe më pas do të mund të hyjnë në brendësi të Terminalit, vetëm nëpërmjet hyrjes kryesore nga ‘City Center’”, njofton policia e Korçës.
“Shërbimet e Policisë, kanë siguruar dhe janë në marrje e vlerësim të çdo lloj informacioni për persona të cilët mund të kenë tendenca për veprime të dhunshme. Aktualisht janë duke u verifikuar disa shtetas, me qëllim sigurimin e rendit publik dhe mbarëvajtjen e eventit, deri në përfundim të tij”, shtuan të njëjtat burime.
