Një aksident me dy viktima është shënuar këtë të Diel, në Fier. Viktimat janë identifikuar si Shkëlzim Beqaj 55 vjeç dhe Uejol Lagjaj, 39 vjeç.
Një automjet tip ‘Nisan’ përfundoi një kanal në Marinëz, ndërsa sipas policisë, 2 personat në bord mund të kenë humbur jetën nga mbytja në ujë. Blutë saktësuan se aksidenti ka ndodhur rreth orës 13:00.
Makina ishte e një kompanie sigurimi private. Fillimisht kanë qenë punonjës së kompanisë që kanë ngritur alarmin pasi kanë parë se pajisja GPS që kishte të instaluar automjeti tregonte se mjeti nuk po qarkullonte. Në pamundësi të kontaktit me kolegët, është njoftuar policia.
Nuk përjashtohet mundësia se drejtuesi i mjetit të ketë pësuar një atak kardiak, duke humbur kontrollin e makinës që ka përfunduar në kanal. Megjithatë hetimet e mëtejshme pritet të hedhin më shumë dritë për ngjarjen.
