Mijëra persona po rrethojnë hyrjet në aeroportin e kryeqytetit afgan Kabul, që është mundësia kryesore e shpëtimit për afganët dhe shtetasit e huaj, të cilët përpiqen të largohen nga vendi tashmë nën kontrollin e talebanëve.
“Të shtënat dëgjohen pothuajse vazhdimisht jashtë kompleksit të aeroportit të armatosur rëndë”, tha një dëshmitar në vendngjarje.
Në portat e kompleksit të aeroportit ka pasur konfrontime të përsëritura të armatosura.
Ushtria amerikane vendos se kur dhe si të hapë dhe mbyllë portat.
“Njoftimet nga altoparlantët në hyrjen veriore thanë se porta do të mbyllej për dy ditë”, shtoi dëshmitari.
Një dëshmitar okular i dytë tha se njerëz nga të gjitha sferat e jetës ishin jashtë aeroportit: aktorë, personalitete televizive, të rinj, gra me foshnje të porsalindura ose njerëz në karrige me rrota mes shumë të tjerëve.
Që kur talebanët morën kontrollin mbi kryeqytetin dhe vendin të dielën e kaluar, mijëra njerëz janë larguar nga Afganistani nëpërmjet aeroportit të Kabulit, pjesa e vetme e kryeqytetit e kontrolluar nga trupat ndërkombëtare.
Një raport i përpiluar për Kombet e Bashkuara paralajmëroi se talebanët po kryejnë kërkime të synuara për bashkëpunëtorët e supozuar me qeverinë e rrëzuar, pavarësisht garancive nga grupi radikal islamik se nuk do të hakmerret.
Presidenti amerikan Joe Biden ka siguruar qytetarët amerikanë dhe afganët, të cilët kanë punuar me amerikanët, se do t’i evakuojnë, por në Afganistan ka ende mijëra.
Trupat nga shumë vende të tjera, përfshirë Gjermaninë, Britaninëe Madhe dhe Turqinë, po kryejnë operacione të njëkohësishme evakuimi nga aeroporti.
