Babë e bir janë arrestuar në Kashar të Tiranës teksa në banesën ku jetonin janë gjetur të mbjella lëndë narkotike si dhe dy armë zjarri e municione.
Në pranga janë vënë Fatmir Sulaj, 56 vjeç dhe Hamdi Sulaj, 25 vjeç.
“Arrestimi i këtyre shtetasve u bë pasi në Kashar, në brendësi të banesës, gjatë kontrollit të ushtruar në një serë bujqësore, u konstatuan të mbjella bimë të dyshuara narkotike të llojit kanabis sativa. Në vijim të veprimeve, gjatë kontrollit të banesës, shërbimet e Policisë gjetën dhe sekuestruan dy armë zjarri automatik dhe municion luftarak, të cilat dyshoheshin se përdoreshin nga autorët për të ruajtur bimën narkotike”, njoftoi policia.
Ndaj tyre rëndojnë akuzat për veprat penale “Kultivim i bimëve narkotike” dhe “Mbajtja pa leje dhe prodhimi i armëve, armëve shpërthyese dhe i municionit” e kryer në bashkëpunim.
