Dy persona janë arrestuar nga policia e Sarandës për veprën penale “Prodhimi dhe shitja e narkotikëve” e kryer në bashkëpunim.
Një prej tyre është pronari i një lokali në qytetin bregdetar.
Në pranga u vunë: Erjon Prifti, 31 vjeç dhe Geart Çoçka, 33 vjeç (i dënuar më parë për veprën penale “Prodhimi dhe shitja e narkotikëve”), të dy banues në lagjen nr.4, Sarandë.
“Arrestimi i tyre u bë pasi gjatë kontrollit në një lokal në Sarandë, në pronësi të shtetasit Erjon Prifti dhe më pas gjatë kontrollit të ushtruar në 2 automjetet në përdorim nga shtetasi Geart Çoçka, që ishin të parkuara pranë lokalit, u gjet dhe u sekuestrua një sasi me lëndë narkotike e dyshuar kanabis, një pjesë e së cilës ishte e ndarë në dhjetëra doza, gati për shitje”, njoftoi policia.
