Banorët dhe pushuesit në Borsh kanë denoncuar ndotjen e bregdetit, që sipas tyre, po bëhet nga subjekti “Summerland”.
Denoncuesit shprehen se resorti u ndërtua pa leje këtë verë, në kohën kur kryeministri thoshte: “Prishini më mirë vetë ndërtimet pa leje, mos ta bëjmë ne”.
Sipas tyre, megjithëse punon vetëm prej një sezoni, ky subjekt po e ndot me shpejtësi plazhin e Borshit, me fekalet dhe mbetjet e kuzhinës.
Ata shprehen se ujërat e ndotura që gurgullojnë veçanërisht në vakt dreke dhe darke përfundojnë në detin e pastër të Borshit, që po e shkatërron me ritme të frikshme babëzia e këtij subjekti, që ka lekë për gjithçka, vetëm për një gropë septike për të qenë jo.
Sipas denoncuesve, pronari ka paguar “para të paparë” për autoritetet lokale dhe më lart.
Ata shtojnë se fakti që po e shkatërron çdo sekondë e më shumë plazhin dhe detin dhe është hapur me gati 80 çadra në plazh, vetëm i legjitimon këto zëra.
Banorët shprehen se për këtë çështje është vënë në dijeni kryetari i bashkisë së Himarës, zoti Jorgo Goro, i cili u është përgjigjur se subjekti është pa leje dhe se ndaj tij do të merren masa.
