Kryeministri Edi Rama ka konfirmuar se mbi 1.000 afganë do të vijnë në Shqipëri brenda kësaj jave.
Deklaratën e ka bërë për spanjollen “El Periodico”, që raporton se Shqipëria dhe Kosova, e më pas dhe vende të tjera të Ballkanit “kanë pranuar kërkesën e SHBA për të strehuar një pjesë të atyre që ikin nga talebanët”.
Kryeministri shqiptar informoi në një intervistë për “El Periodico”, se vendi i tij do të marrë një grup të parë me rreth 1.000 azilkërkues afganë këtë javë.
Një pjesë e afganëve pritet të strehohen në Qytetin Studenti në Tiranë, në godinat ku qëndrojnë studentë që ndjekin arsimin e lartë. Këtë të Mërkurë, ministrja e Jashtme Olta Xhaçka tha se një kamp për strehimin e afganëve do të ndërtohet në Lezhë.
Ende nuk është bërë i qartë numri i afganëve që do të presë Shqipëria, por në media është raportuar se do të jenë rreth 2.000 të tillë. Pasditen e sotme, pritet ardhja e 300 të parëve.
Raportohet se afganët që largohen nga Atdheu pas marrjes së pushtetit nga talebanët do të qëndrojnë përkohësisht në Shqipëri, për tu transportuar më tej në SHBA.
