Mediat italiane vijojnë të publikojnë detaje lidhur me ngjarjen tragjike të ndodhur te një familje shqiptare, ku burri pasi i mori jetën bashkëshortes, vrau edhe veten.
Sot mediat italiane kanë hedhur hipotezën se shqiptari, Shkëlqim Bedeli, mund të kishte kohë që e kishte planifikuar krimin.
Shqiptari, një farkëtar i zoti siç e përshkruajnë fqinjët për mediat italiane, pak kohë më parë kishte lënë edhe punën.
Mediat italiane shkruajnë se në dy letrat që ai la para se të ndërmerrte aktin tragjik, njëra drejtuar autoriteteve policore dhe tjetra për fëmijët e tij, autori fliste për një gjendje të keqe shpirtërore që e kishte shoqëruar prej muajsh, e cila mesa duket është bërë shkak për fundin dramatik.
Në letrat që shkroi para vetëvrasjes, Shkëlqim Bedeli gjithashtu flet edhe për disa grindje mes tij dhe bashkëshortes, por edhe një xhelozi që sa vinte e shtohej ndaj saj.
“Nuk përjashtohet që ai të vuante nga depresioni”, shkruajnë mediat italiane.
Për fqinjët, Bedeli dhe Paeshti ishin një çift i qetë, që nuk dukeshin të kishin probleme.
“Por në një mëngjes gushti, ndodhi një vrasje brutale, e paramenduar deri në detajet më të vogla, dhe kush e di për sa kohë”, shkruajnë mediat italiane.
