Presidenti amerikan, Joe Biden, zbuloi gjatë një konference nga Shtëpia e Bardhë bisedën që ka bërë me homologun e tij të Afganistanit, Ashraf Ghani, një ditë pasi militantët talebanë morën kontrollin e vendit.
Biden është shprehur se qeveria afgane nuk e ka dëgjuar këshillën e tij, duke mos negociuar për një zgjidhje politike me talebanët.
Në fjalën e tij, Biden theksoi se “z.Ghan këmbënguli se forcat afgane do të luftonin, por rezultoi që ai kishte gabuar”.
Presidenti i SHBA-ve theksoi se nuk ka qenë kurrë një kohë e mirë për t’u tërhequr, ndërsa theksoi se marrëveshja me presidentin Trump me talebanët e zvogëloi praninë e trupave amerikane në vend nga 15 mijë e 500 ushtarë në 2 mijë e 500.
“Në shkuam në Afganistan gati 20 vjet më parë me qëllime të qarta: të gjenim ata që na sulmuan më 11 shtator 2001 dhe të siguroheshim që Al Kaeda nuk mund ta përdorë Afganistanin si një bazë nga e cila do të na sulmojë përsëri. Ne e bëmë atë.
Ne kurrë nuk hoqëm dorë nga gjuetia për Osama bin Laden dhe e gjetëm atë. Kjo ishte një dekadë më parë. Misioni ynë në Afganistan nuk ishte menduar të ketë qenë ndërtimi i kombit”, tha ai
Ai theksoi se marrëveshja e Trump me talebanët, detyroi që deri me 1 maj të largoheshin trupat ushtarake amerikane nga Afganistani.
“Talebanët ishin më të fortë ushtarakisht që nga viti 2001″, u shpreh ai.
“Zgjedhja që duhej të bëja si presidenti juaj ishte ose të zbatoja atë marrëveshje, ose të isha gati të kthehesha në luftë kundër talebanëve“.
Sipas tij, nuk ekzistonte asnjë marrëveshje pas datës 1 maj për të mbrojtur trupat amerikane nga talebanët.